Mungiako Udalak, herriko mugimendu feministarekin batera, indarkeria matxistaren aurrean jarduteko protokoloa eguneratu du. 2022an sortutako dokumentua da, adostutako esparru eta egitura bat erraztea du helburu, eta urtero eguneratzen eta hobetzen da, behar guztiei erantzuteko. Gainera, Udalak saio bat antolatu du Jai Batzordean, txosnetan eta ostalaritzan parte hartzen duten elkarteetako ordezkariei eta Mungiako emakumeen elkarteetako eta mugimendu feministako kideei oinarrizko ezagutzak eskaintzeko eta gai horretan trebatzeko.
Mungiako Udaleko Gizarte Ekintza eta Berdintasun zinegotzi Bakarne Egiak honako hau adierazi du: "erantzun nahi diogun indarkeria matxistak erasotzaile eta biktima indibidualak ditu, baina, arazo estrukturala da, hau da, ez dira gertakari isolatuak eta azalpen bat dute. Kezkatzen eta haserretzen gaituen gai bat da, eta gure ustez, erantzun bateratu bat eman behar dugu, biktimak babestuz, presionatu gabe ".
Ildo horretan, zinegotziak honako hau gaineratu du: "aipatutako kolektiboak inplikatu nahi ditugu, jai-erakundearen zati estrategikoa direlako, eta beharrezkoa delako informatuta eta prestatuta egotea, emakume baten aurkako erasoren bat hautematen badute edo horren berri jasotzen badute nola jokatu jakiteko. Hala ere, jaiak normaltasunez, errespetuz eta berdintasunez garatzea espero dugu, emakumeen aurkako inolako erasorik gabe ".
Protokoloaren helburua adostutako esparru eta egitura bat erraztea da. Alde batetik, hori betetzeko konpromisoa hartzen dutenak ezartzen dira, bai eta egitura horren esku jartzen diren baliabideak nola eta zein diren ere. Bestetik, eraso mota desberdinen aurrean jarduteko jarraibideak ematen ditu, eta, azkenik, eraso baten ondorengo ordu eta egunetan zer egin beharko genukeen adierazten du, halakorik gertatuz gero. Hori guztia modu ordenatuan eta aurrez ezarritako eta adostutako eredu baten arabera, dokumentua 2022an egiten hasi ginenean, eta urtez urte hobetuta, aurreko ekitaldiko esperientziaren arabera. Protokolo honek Mungiako Txosnen Batzordearen adostasuna du.
Indarkeria matxistari buruzko prestakuntza
Era berean, ideiak freskatzeko eta indarkeria matxistari buruzko oinarrizko prestakuntza eskaintzeko, Udalak bi orduko prestakuntza-saio bat antolatu zuen (17:30-19:30). Alderdi teorikoan, indarkeria matxista motak jorratu ziren; alderdi praktikoan, berriz, Rol-Playing metodologia erabili zen kasu errealak lantzeko. Udalak Mungiako Jai Batzordean, txosnetan, ostalaritzan, emakumeen elkarteetan eta mugimendu feministan parte hartzen duten elkarteetako ordezkariak deitu zituen.
Gainera, Udalak hainbat material banatu ditu txosnetan eta hainbat establezimendutan, hala nola paperezko ahozapiak "Mungiak indarkeria EZ!" logoarekin eta "BAI baino ez da BAI!!!" esaldiarekin; kartelak harremanetarako telefonoekin eta erasoen aurrean jarduteko jarraibideekin; alkoholimetroak eta alkohol-tasaren erregeletak; eta, are gehiago, musika ez-sexistaren Spotify aplikazioaren esteka.