Irailaren 22ko ‘Nire autorik gabeko eguna’ eta Mugikortasunaren Europako Astea direla eta, Mungiako Udalak, herriko ikastetxeen lankidetzarekin, gaur goizean Oinez Busa ospatu du Matxin plazan, milaka ikaslerekin batera. Alaitz Erkoreka Mungiako alkateak adierazi duenez, "ekintza hauen helburua etorkizuneko belaunaldiak jasangarritasunaren garrantziaz kontzientziatzea da. Horretarako, lanean jarraituko dugu emisio kutsatzaileak murriztearen garrantziaz herritarrak kontzientziatzeko beharrezkoak diren tresnak eta ezagutzak errazten".
Gaurko ekitaldiarekin hasiera ere eman zaio 2030 Agenda Eskolako ikasturte berriari. Horrela, Haur Hezkuntzako 5 urtetik Lehen Hezkuntzako 6. mailara bitarteko ikasleak, ohi bezala klasera joan ondoren, beren ikastetxetik abiatu dira Mungiako herrigunera, zehazki Matxin plazara, non beste ikastetxe batzuetako ikasle guztiekin bildu diren. Bertan, hamaiketako osasungarria hartu dute, eta ondoren, Udaleko arduradun politikoekin egon dira.